Emil

Nu seggt blots, Ji kennt Emil nicht? Dissen lütten, witten Baar, de al in dree Böker de Hauptrull speelt, und dat "för lüttje Lüüd un Grote"? Emil, de egens blots 15 cm hoog is und siene Been nicht lang maken kann? Emil, de dör en Tofall, orer beter dör en lütten Jung levig maakt un in en Book steken wörr?
Dat 'n den Emil in mannigeen Bookladen nicht finnen kann, liggt woll doran, dat so mannigeen Bookverköper keen Platt kann.

Un dorso künnt Ji den Emil nu hier in 't Net finnen, bestellen, un denn, op ole Aart, tohuus lesen.

Wenn de Sünn mööd slapen geiht...

Wenn de Sünn mööd slapen geiht...

„Wenn de Sünn mööd slapen geiht..." is ’n Gode-Nacht-Book, rutkamen in ’t Johr 2000. Ok hier is dat de Baar Emil, de „lüttje Lüüd, de na Bett gahn schüllt" mit’n Gedicht dorhen bringen deit. Denn so, as dat buten in ’e Natur gegen Avend stiller warrt, makt sik ok binnen in ’t Huus grote un lüttje Deerten parat för ’t Bett. Mööd geiht de Sünn ünner, de Blomen gaht slapen, Nachtfalter un Moond aver staht op. Un in ’e eensomen Straaten drapt sik blots noch Katt un ’n Spöök mit ’n Latücht in’e Hand. Bit de lüttje Emil endlich op siene Reis in ’t Droomland geiht un ünner’n blömte Deek över eene Anemonenwisch sweevt, slapt Müüs, Draken, Aant, de Tulpen in ’e Blomenvaas un sogors dat Veehtügs in ’e Billerrohmens deep un fast.
Ok de lütten Lüüd, för de dit Book dacht is, warrt na ’t Lesen woll datsülvige dohn.

"Wenn de Sünn mööd slapen geiht..."
'n plattdüütsch Gode-Nacht-Book vun Birgit Lemmermann
1. Oplaag 2000

ISBN 978-3-88132-543-1, to 'n Pries von € 15,60

Ut 'n Leven von Emil

Ut'n Leven von Emil

"Ut 'n Leven von Emil" is 1994 rutkomen un vertellt in 12 Biller un lüttje Texten, de ok Nich-Plattdüütsche goot verstahn künnt, "för Lüüd af annerthalf". Buntige, opwennig maalte Aquarelle wiest uns den Alldag von den lütten, witten Baar; vun 't Opstahn bit to 'n Nabettgahn, vun 'e Arbeit in 'n Goorn ("anners gifft dat in 'n Winter nix to bieten"), von't Telten un den Pissputt ünner 't Bett.
In dat ierste Bild künnt wi den Emil nich sehn, "denn dat is Nacht un blots de Moond schient". Bit he wedder in sien Bett liggt un snorkt, sünd wi mit em langs gahn, hebbt fröhstückt mit Navers Katt, sünd wannert "bit achtern Barg, wo de Heven anfangen deit", hebbt sien Aventüür mit een olle Zinkwann as Boot beleevt un den groten Baaren an Heven bekeken. Un denn fangt egens dat Book vun vörn wedder an.

"Ut 'n Leven von Emil" is dat leevste Book vun veele Kinner worrn un belitten al in'e föfte Oplaag.

"Ut'n Leven von Emil"
Opschreven un tekent vun Birgit Lemmermann.
5. Oplaag 1997
To bestellen ünner de ISBN 978-3-88132-544-8, dat Book köst' € 15,60

Ut de Kinnertiet von Emil

Ut de Kinnertiet von Emil

De Bontjenkönig weer dor ween. Emil stünn vör 'n Disch un seeg de gröttsten Bontjen, den 'n sik denken kann. Un siene Kroon harr he ok vergeten, de lüttje König mit den groten Bontjen. Un dorüm möök dat ok nix, dat dat blot 'n Droom ween wöör, meern in de Nacht. „Ut de Kinnertiet von Emil" keem 1996 rut un vertellt von Emil siene Aventüür as lüttje Baar bit in siene Schooltiet, dorvun, wat he mit de Höhner beleevt, mit de Hummeln un mit siene Bann. In dit Book kann een rutfinnen, wat sik dat anföhlt, in ’n Waterammel mit Lock dorbinnen to baden, wat Opas op ’n Kökendisch verloren hebbt orer Pannkoken op ’n Kopp. „Ut de Kinnertiet..." treckt us dör de Welt von de Lütten un toglieks dör all de Tieten vun ’t Johr. De deelwies duppelsietigen Aquarell-Biller hebbt Texten, de ‘n beten länger sünd: man schull woll ‘n beten Plattdüütsch könen orer een in ’e Neegde weten, de dat kann.

„Ut de Kinnertiet von Emil"
Erinnert, opschreven un opmaalt vun Birgit Lemmermann
1. Oplaag 1996,

"Ut de Kinnertiet von Emil" is jüst ut, warrt aver bald wedder verleggt!